+47 75 77 51 00 poassta(alfa)arran.no

Bårjås 2006

Ulmutja, årudagá ja guhkesá...
Folk, hus og lange tanker...
 NOK 90    
Bårjås06
Dát la gávtsát ájggetjála Bårjjåsis, ja le aj gávtsát bále mån dåjmadiddjen åvddåtjállagav tjáláv. Låhkkij ja diŋŋgujiddje lågo li maŋenagi lassánam, ja vuojnunagi låhkke berusti Bårjjåsav låhkåmis. Dassta mij dijáv gijttep. Åvdep jagijt lip gæhttjalam tiemáj milta tjállet. Dán jage lij gássjelabbo nuoges artihkkalijt gávnnat avta tiemá birra. Valla javllap galla Bårjås 2006 la ulmutjij birra (dat sihtá javllat guoktása birra) ja la sajij birra gånnå ulmutja årru. Duodden la dan giela birra mav ulmutja adni, ságastalátjit ja ájádalátjit… Guokta vuostasj artihkkala li guoktása birra gudi lijga sierralágásj ulmutja ietjaska viessomájgen. Vuostasj artihkkal la oabme tjálos tjáledum Olaf Holmas jagen 1880. Sån tjálij ”Nils Størka” birra, gut lij sierralágásj ålmåj Divtasvuonan. Tjálos la gielalattjat ådåstuhtedum ja tjuovvusin li moalgedime bájkkehistorihkkáris Hilgunn Pedersen. Hilgunn Pedersen iesj la tjállám nuppe ulmutja birra gen birra li moadda subttsasa; ”Buks-Beret”. Beret viesoj 1800-lågo gassko ja bargaj duola dagu oajvven ietjas tjevsan fisskon. Dajna vuogijn suv dago lidjin viehka ienebuv gå sjiervverolla ietjas ájge. Huoman gávnnujin máhttelisvuoda dasi sáme sebrudagán. Nav galla ij lim dáttjaj sebrudagán. De juohkkahasj oadtju merustallat gåktu sjiervverolla ja avtadássásasjvuohta vuojnnuji dán ájggásasj sáme ja dáttja sebrudagájn. Gålmmå artihkkala dán jage li årroma ja årudagáj birra. Lars Erik Narmo tjállá åvdep ájge årroma birra Vágijn Lofåhtan, ja tsuojgot ruovddeájge lidjin ienep sáme gudi dåppe årrun gå majt dán rádjáj lip adnám. Arnstein Brekke giehttu bargo birra suoddjit ja divudit sáme årudagájt åvdep Skierrestáde suohkanin. Jagen 1990 ællim sáme årudagá, valla dálla li registreridum birrusij 20 årudagá Skierrestáden, moattes li aj divudam. Dát årudaksuoddjimprosjækta l sáme iesjdåbdov bigodahttám, ja sámevuohta l aj ienebut dåhkkidum Skierrestáden. Valla årromsadje l ienep gå årromguovllo ja årudahka. Guoradallamijnis Sunniva Skålnes vuoset årromsajij tjadnasijt sosiálalasj luonnduj, ja adnem- ja mujttoluonnduj, adjáj Divtasvuonan. Sån moalggá duola dagu Divtasvuona sámijn li guokta årudagá, nubbe gånnå årru ja nubbe masi utjárdi. Åhtsålibme la aj tiebmán sáme ”moarsselávllagijn”. Harald O. Lindbach tjállá gåktu gielav giellat. Buojkulvisáj vuoset sáme poesijav oarjját ja nuorttat, ja adjáj nuoraj guhkes ájádusájt… Doajvvop Bårjås 2006 buoragit vuosstájváldeduvvá ja adjáj buktá ienep ájádusájt sámevuoda birra åvddåla ja dálla. Lars Børge H. Myklevold, dåjmadiddje
Language Sami - SamiskLanguage Norsk - Norwegian

Webshop

8270 Ájluokta/Drag
Tlf: +47 75 77 51 00
Faks: +47 75 77 51 01
E-post: poassta(alfa)arran.no